ភ្នំពេញ៖ ព្រះរាជអាជ្ញាខេត្តកំពង់ធំកំពុងស្រាវជ្រាវ និងប្រមូលរបាយការណ៍ពីករណីសិស្សស្រី ២នាក់វ៉ៃគ្នាផ្អើលហ្វេសបុក និងត្រូវបានចុះផ្សាយក្មេងស្រី ៣នាក់ព្រួតវាយក្មេងម្នាក់ដែលកំព្រាឳពុកម្ដាយ ដែលបង្កឱ្យមានការខឹងសម្បារពីមហាជន។

អ្នកនាំពាក្យអយ្យការខេត្តកំពង់ធំ លោក សាយ វាសនា បានប្រាប់ EAC News នៅល្ងាចថ្ងៃទី១៨ ខែមករានេះ ថាតាមរបាយការណ៍សមត្ថកិច្ចដែលបានបញ្ជូនមកតុលាការគឺមិនដូចការចុះផ្សាយមួយចំនួននោះទេ។ លោកបញ្ជាក់ថាករណីនេះគឺជារឿងគំនុំរបស់សិស្សដែលរៀនថ្នាក់ជាមួយគ្នា ហើយហៅគ្នាទៅវាយគ្នាយកចាញ់យកឈ្នះ ដែលសិស្សស្រីដែលនៅក្រោមគឺជាអ្នកវាយគេមុន និងហាមមិនឱ្យសិស្សដទៃទៀតជួយនោះទេ។

តាមរបាយការណ៍គឺសិស្សទាំងពីរនោះគឺជាកូនកំព្រាឳពុកម្ដាយដូចគ្នាមិនមែនម្ខាងមានឪពុកម្ដាយទៅវាយលើក្មេងដែលកំព្រានោះទេ។

ទោះជាយ៉ាងណាលោក សាយ វាសនា បន្តថាករណីនេះអយ្យការខេត្តនឹងបន្តស្រាវជ្រាវបន្តទៀតនៅថ្ងៃទី១៩ ខែមករា ឆ្នាំ២០២៣។

គួរឱ្យដឹងផងដែរថាកាលពីប៉ុន្មានថ្ងៃមុនមានការបង្ហោះវីដេអូនៃការវាយគ្នារវាងសិស្សស្រី ២នាក់ដែលថាបានកើតឡើងនៅវិទ្យាល័យតាំងក្រសាំងក្នុងខេត្តកំពង់ធំ ដែលថានៅមិនទាន់មានចំណាត់ការពីអាជ្ញាធរនៅឡើយ៕